Ualikhanov University-де цифрлық қауіпсіздікке төнетін заманауи қатерлер талқыланды
16 қазанда Ualikhanov University-де Бизнес және құқық жоғары мектебінің Құқық кафедрасы ұйымдастырған «Цифрлық қауіпсіздікке төнетін заманауи қауіптер: алаяқтыққа, интернет-алаяқтыққа және дропперлік схемаларға қарсы іс-қимыл» тақырыбында халықаралық ғылыми-практикалық конференция өтті.
Конференцияға мемлекеттік және құқық қорғау органдарының, сот жүйесі мен заң саласының өкілдері, Қазақстан мен шетелдік жоғары оқу орындарының ғалымдары, оқытушылар, докторанттар, магистранттар және студенттер қатысты.
Жиынның ашылуында Ualikhanov University-дің әлеуметтік-мәдени даму жөніндегі проректоры Ардақ Қапышев пен Бизнес және құқық жоғары мектебінің директоры Абай Ысқақов қатысушыларға құттықтау сөз сөйледі. Конференцияның модераторы ретінде Ualikhanov University Құқық кафедрасының қауымдастырылған профессоры Бағдат Рахметулина жұмыс жүргізді.
Конференцияға ҚР Мемлекеттік қызмет істері агенттігінің Ақмола облысы бойынша департаментінің басшысы Нұрқат Батырқұлов, Ақмола облыстық сотының, прокуратураның, полиция, экономикалық тергеп-тексеру және әділет департаменттерінің өкілдері, сондай-ақ адвокаттар қатысты.
Ғылыми қауымдастық атынан Л.Н. Гумилев атындағы Еуразия ұлттық университетінің профессоры Жамаладин Ибрагимов, Maqsut Narikbayev University профессоры Олжас Сейтжанов, Абай атындағы Қазақ ұлттық педагогикалық университетінің және басқа да жоғары оқу орындарының ғалымдары қатысты.
Конференцияға шетелдік ғалымдар да онлайн форматта қосылды. Олардың қатарында Өзбекстандағы Ташкент мемлекеттік заң университетінің профессоры Дилбар Суюнова, Қырғыз халықаралық университетінің профессоры Асан Ормушев және Ресейдегі Г.Р. Державин атындағы Тамбов мемлекеттік университетінің заң ғылымдарының кандидаты Руслан Пузиков болды.
Пленарлық отырыс пен секциялық жұмыстар барысында интернет-алаяқтықтың заманауи тәсілдері, дропперлік схемалар және оларға қатысқаны үшін қылмыстық жауапкершілік, азаматтардың жеке және банктік деректерін қорғау, сондай-ақ цифрлық қылмыстарға қарсы іс-қимыл саласындағы заңнаманы жетілдіру мәселелері талқыланды. Халықаралық тәжірибеге, халықтың құқықтық мәдениетін арттыруға және киберқылмыспен күресте жасанды интеллект мүмкіндіктерін пайдалануға ерекше назар аударылды.
Конференция жұмысы «Қылмыстық заңнаманы жетілдіру: интернет-алаяқтықты саралау мәселелері және цифрлық қылмыспен күресудегі халықаралық тәжірибе» және «Цифрлық ортадағы азаматтардың қауіпсіздігі: алаяқтықтың алдын алу және қылмыстық схемалардан қорғану» атты екі секцияда жалғасты.
Ғалымдар мен тәжірибелі мамандармен қатар докторанттар, магистранттар және студенттер де өз зерттеулерін ұсынды. Жас зерттеушілер интернет-алаяқтықтың құқықтық аспектілерін, дербес деректерді қорғау, киберқылмыстың алдын алу және цифрлық қауіптерге қарсы күресте жасанды интеллектіні қолдану мәселелерін қарастырды.
Халықаралық конференция ғылыми және тәжірибелік тәжірибе алмасуға, цифрлық қауіпсіздіктің өзекті мәселелерін жан-жақты талқылауға, сондай-ақ жоғары оқу орындары, мемлекеттік органдар мен заң саласы мамандары арасындағы ынтымақтастықты нығайтуға мүмкіндік берді.