Ualikhanov University-де бос жұмыс орындары жәрмеңкесі өтті
2026 жылғы 28 сәуірде Ualikhanov University-де Университеттің Мансап орталығы ұйымдастырған дәстүрлі бос жұмыс орындары жәрмеңкесі өтті. Іс-шара Педагогикалық институттың бітіруші түлектері мен Ақмола облысының жұмыс берушілерінің қатысуымен өтті.
Жәрмеңкеге өңірдің 100-ден астам мектебінің өкілдері қатысты. Атап айтқанда, Ерейментау, Жарқайың, Зеренді, Сандықтау, Целиноград, Шортанды, Ақкөл, Астрахан, Атбасар, Бұланды, Біржан сал, Бурабай аудандары мен Степногорск қаласынан келген білім беру ұйымдары қамтылды.
Шараға педагогикалық және жаратылыстану бағытындағы білім беру бағдарламалары бойынша білім алып жатқан 485-ке жуық студент қатысты. Бұл жәрмеңкенің өңір үшін маңыздылығын көрсетеді.
Ualikhanov University - Ақмола облысында педагог кадрларын даярлайтын жетекші жоғары оқу орындарының бірі. Бүгінде өңір мектептерінің басым бөлігінде университет түлектері еңбек етуде, бұл білім сапасына деген жоғары сенімді дәлелдейді. Педагогикалық институт елдегі жетекші оқу құрылымдарының қатарында. Түлектердің еңбек нарығында сұранысқа ие болуы мен жұмысқа орналасу деңгейінің жоғары болуы - сапалы білімнің нәтижесі.
Жәрмеңкенің ресми ашылуында жұмыс берушілер студенттердің кәсіби даярлығының жоғары деңгейін, олардың тәжірибелік дағдылары мен жұмысқа дайындығын ерекше атап өтті.
Іс-шара барысында студенттер:
- жұмыс берушілермен тікелей байланыс орнатып,
- алдын ала сұхбаттардан өтіп,
- өздерін қызықтырған бос жұмыс орындары туралы ақпарат алды.
Ал жұмыс берушілер үшін жәрмеңке жас мамандарды іріктеу мен университетпен серіктестікті нығайтудың тиімді алаңы болды.
Ualikhanov University білім беру мен еңбек нарығы арасындағы байланысты нығайта отырып, түлектерінің кәсіби жолын бастауына нақты мүмкіндік жасап келеді.