Ualikhanov University студенттері мен қызметкерлері төтенше жағдайлар және өрт қауіпсіздігі бойынша оқу-жаттығуларға қатысты

Қыркүйек айының барысында Ualikhanov University оқу корпустары мен жатақханаларында төтенше жағдайлар, антитеррористік және өрт қауіпсіздігі бойынша кешенді оқу-жаттығулар ұйымдастырылды. Іс-шаралар университеттің қауіпсіздік қызметі, Ақмола облысы полиция департаментінің және Көкшетау қаласы ТЖ қызметкерлерімен бірлесіп, университеттің іс-шаралар жоспары мен жол картасы аясында өткізілді.

Оқытушылар, әкімшілік қызметкерлер және студенттер төтенше жағдайлар кезінде әрекет ету дағдыларын пысықтады. Қатысушыларға террористік акт қаупі туындаған жағдайда әрекет ету бойынша қадамдық нұсқаулықтар берілді. Жылдам қимылдайтын арнайы жасақ қызметкерлері өзін-өзі қорғаудың тиімді әдістерін көрсетті, ал ТЖ мамандары алғашқы өрт сөндіру құралдарын қолдану ережелері мен өрт шыққан кездегі іс-қимыл тәртібін түсіндірді.

Іс-шаралардың практикалық бөлігі оқу корпустары мен жатақханалардан нақты эвакуациялардан, сондай-ақ ашық алаңда от тұтатып, өрт сөндіргіштерді қолдану жаттығуларынан тұрды. Қатысушылар өзін-өзі қорғау және өрт сөндіру құралдарын қауіпсіз пайдалану дағдыларын шынайы жағдайға барынша жақын ортада бекітті.

Оқу-жаттығулардың мақсаты - студенттер мен қызметкерлердің төтенше жағдайлар кезінде қауіпсіз әрекет етуге, өзін және айналасындағыларды қорғауға қажетті білім мен дағдыларын қалыптастыру, террористік қауіп төнген жағдайда дұрыс шешім қабылдау қабілетін дамыту, сондай-ақ алғашқы өрт сөндіру құралдарын тиімді қолдану тәжірибесін үйрету.

Мұндай іс-шаралар қатысушыларға төтенше жағдайларда қауіпсіз мінез-құлықтың маңыздылығын түсінуге көмектесіп, нақты қауіп туындаған жағдайда сенімді әрі дұрыс әрекет етуге мүмкіндік беретін тәжірибелік дағдыларды қалыптастырады.